Новоселиця

Як жили наші люди щи не так давно? Ци інтересно бы вам было побзерати, як вызирало обшаря, де росли ваші дідик тай бабка? Час утікат шіковно, тай из тых старых хыжок обстала ся крыхта. А котрі ся обстали — далеко не усе маєме шансу їх видіти, просто завто, ож далеко сьме.

Спозад такої журы за тым давньым и родив ся проєкт „Новоселиця“, де попробовали сьме сотворити даякый онлайн-музей гіпотетичного села у Пудкарпатю, базованого у рокови 1928, на первув ґарадичи розвоя індустрії. Зачинало ся всьо из простенької інструкції, ож ба як покласти русинську хыжу у бавці Minecraft, а кунчило ся цілым селом, по котрому можете пошпаціровати онлайн уєдно из цімборами!

Сідайте у возик, штрека вас шіковно доправит у село дітвацтва вашої старшины… у Новоселицю!

Трейлер

Як ся пудкапчати

Май детална інструкція (про домак новачкув)

Обы навщивити Новоселицю, вам треба Minecraft: Java Edition, доступный на Windows, macOS и Linux. Кідь єсьте уже куповали Minecraft у Windows/Xbox Store, та скорше всього уже маєте копію Java Edition.

На днешньый день на Новоселицю не мож зайти из Minecraft: Bedrock Edition, доступного на Xbox, PlayStation, Android тай iOS — айбо аж будеме видіти, ож є жаданя на такоє, та може в будучности будеме робити и над пудпоров Bedrock Edition про йсі платформы.

Кідь говорити май точно, та треба вам Minecraft: Java Edition верзії 1.20.6 вадь высшої — верзію мож убрати у лончерови Minecraft, у котрому запущаєте бавку.

У офіційному лончерови Minecraft тото ся чинит так:

1. У лівому меню уберіт Minecraft: Java Edition.
2. Горі перейдіт на вкладку Installations.
3. Авадь додайте нову інсталацію Minecraft через Add installation, авадь змініт верзію на уже екзістувучуй інсталації через … → Edit.
4. Покладіт верзію інсталації 1.20.6 авадь высшу.

Кой зайдете у бавку, нажміт „Бавка по сітці“ (Multiplayer), дале „Додати сервер“ (Add server); у ґрафу „Назывка сервера“ (Server name) годні сьте вписати хотьшто, айбо у ґрафу „Адрес сервера“ (Server address) мусите вписати (вадь скопіровати тай вставити) play.novoselytsia.kocky.cc.

Аж усьо сьте добрі наштімовали, та має вас пустити пудкапчати ся на Новоселицю!

Чом ипен „Новоселиця“?

Не на фіґлю, сесе майчекана назывка на гет новоє село, котроє чилядь недавно заклала. Лишек у Закарпатськув области в Украйині найдеме такых чотыри: коло Перечина, коло Мукачова, коло Хуста, коло Тячова.

Нашто, аж сут фізичні музеї?

Найдеме немало музеюв народної архітектуры — гикой тот такой сканзен в Ужгороді — айбо такі міста мавут и свої недостаткы:

• треба туды фізично йти, што даколи просто не годни сьме учинити;
• они сут обмежені у тому, што можут указати, спозад ґеоґрафічної лімітації, тай простого зостаріня експонатув.

Нич из сього Новоселиця в онлайнови не має. Прикапчуйте ся из цімборами — задарь, хотьколи, хотьде!

Што мож у Новоселици інтересного найти?

Мапа Новоселиці

1. Хыжа
2. Каплиця
3. Церьков
4. Школа
5. Торговый причал
6. Салаш
7. Фабрика
8. Гамора
9. Поща
10. Торговиця
11. Корчма
12. Театер

Панорамы

Локації